12 ເດືອນກໍລະກົດ / 2019

ກອງປະຊຸມຄະນະກຳມາທິການຮ່ວມມື ຣັດເຊຍ-ລາວ ຄັ້ງທີ 15 ໄດ້ຈັດຂຶ້ນຢູ່ ມົດສະກຸ.


ກອງປະຊຸມຄະນະກຳມາທິການຮ່ວມມືດ້ານ ເສດຖະກິດ-ການຄ້າ ແລະ ວິທະຍາສາດ-ເຕັກນິກ ຣັດເຊຍ-ລາວ ຄັ້ງທີ 15 ໄດ້ຈັດຂຶ້ນຢູ່ ນະຄອນຫຼວງ ມົດສະກຸ, ພາຍໃຕ້ການນຳພາຂອງ ທ່ານ ໂກສະຕັງຕິນ ໂນສະກົບ, ລັດຖະມົນຕີກະຊວງຄົມມະນາຄົມ ແລະ ສື່ມວນຊົນ ແຫ່ງ ສ. ຣັດເຊຍ ແລະ ທ່ານ ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ ແຫ່ງ ສປປ ລາວ. ສອງຝ່າຍ ໄດ້ປຶກສາຫາລືກັນ ກ່ຽວກັບສະພາບການຮ່ວມມືກັນໃນປັດຈຸບັນ ແລະ ທິດທາງການຮ່ວມມືສອງຝ່າຍ ໃນຂົງເຂດການຄ້າ, ການລົງທຶນ, ພະລັງງານ, ອຸດສາຫະກໍາ, ICT, ວິທະຍາສາດ ແລະ ການສຶກສາ.

ໃນຕອນທ້າຍຂອງກອງປະຊຸມດັ່ງກ່າວ ລັດຖະມົນຕີຂອງສອງປະເທດ ຣັດເຊຍ-ລາວ ໄດ້ລົງນາມເອກະສານຮ່ວມກັນ ໂດຍສະເພາະ ບໍລິສັດ A-Rxiena, ບໍລິສັດ Inter RAO-Engineering ແລະ ລັດຖະບານ ແຫ່ງ ສປປ ລາວ ໄດ້ລົງນາມຂໍ້ຕົກລົງ ກ່ຽວກັບການພັດທະນາໂຄງການເຊກອງ 5.ອົງການພະລັງງານນິວເຄຼຍແຫ່ງລັດ ໂຣດອາຕອມ ແລະ ກະຊວງພະລັງງານ ແລະ ບໍ່ແຮ່ ແຫ່ງ ສປປ ລາວ ໄດ້ເຊັນບົດບັນທຶກຄວາມເຂົ້າໃຈ 2 ສະບັບ ເຊັ່ນ: ການເຜີຍແຜ່ຄວາມຮູ້ດ້ານພະລັງງານນິວເຄຼຍ ໃຫ້ແກ່ປະຊາຊົນ; ການຮ່ວມມືດ້ານການສຶກສາ ແລະ ກະກຽມການຝຶກອົບຮົມດ້ານພະລັງງານນິວເຄຼຍ ຢູ່ ສປປ ລາວ.