President of Russia

Government of Russia

 

MFA Russia

ຣັດເຊຍ ຈະສະຫນອງການຊ່ວຍເຫຼືອແກ່ ສປປ ລາວ ໃນການເກັບກູ້ລະເບີດທີ່ບໍ່ທັນແຕກ ຢູ່ພາຍໃນປະເທດ

​ເພື່ອ​ເປັນການປະຕິບັດຄໍາສັ່ງ ຂອງປະທານາທິບໍດີ ​ແຫ່ງ ສ. ຣັດເຊຍ, ​ສູນປະຕິບັດງານແຫ່ງຊາດ ຂອງກອງກໍາລັງປະກອບອາວຸດ​ແຫ່ງ ສ. ຣັດເຊຍ ໄດ້​ມີ​ການຈັດ​ສົ່ງ​ຫນ່ວຍ​ງານ ໄປຍັງ ສປປ ລາວ ເພື່ອຊ່ວຍເຫຼືອ ສປປ ລາວ ​ໃນ​ການ​ເກັບ​ກູ້​ລະ​ເບີດທີ່​ບໍ່​ທັນ​ແຕກ ຢູ່​ພາຍ​ໃນ​ປະ​ເທດ.

ການ​ປະຕິ​ບັ​ດງານ​ເກັບ​ກູ້​ລະ​ເບີດ ຈະ​ໃຊ້​ເວລາ​ປະມານ 05 ​ເດືອນ, ຊຶ່ງ​ເລີ່​ມ​ແຕ່ເດືອນ ຕຸລາ 2018 ຫາ ​ເດືອນ ມີນາ 2019. ນອກ​ນັ້ນ, ຊ່ຽວຊານ ຣັດ​ເຊຍ ຍັງ​ຈະ​ຊ່ວຍ​ຝຶກອົບຮົມ​ໃຫ້​ແກ່ ພະນັກງານ​ຂອງ ສປປ ລາວ ​ແລະ ຈະ​ຊ່ວຍ​ພວກ​ເຂົາ​ໃນ​ການ​ຄົ້ນ​ຫາ ​ແລະ ສິດ​ສອນວິທີການ​ປ້ອງ​ກັນ​ຕົວ​ແບບ​ບຸກຄົນ.

ໃນລະຫວ່າງການປະຕິບັດງານຢູ່ ສປປ ລາວ, ຣັດ​ເຊຍ ຈະ​ສ້າງສາຂາຂອງ​ສູນປະຕິບັດງານແຫ່ງຊາດ ຂອງກອງກໍາລັງປະກອບອາວຸດ​ແຫ່ງ ສ. ຣັດເຊຍ ຂື້ນ, ເຊິ່ງຈະກາຍເປັນສາຂາທີ 02 ຂອງຫນ່ວຍງານດັ່ງກ່າວ ທີ່ຕັ້ງຢູ່ຕ່າງປະເທດ. ໃນປີ 2017 ສູນເກັບກູ້ລະເບີດແຫ່ງ ສ. ຣັດ​ເຊຍ ດັ່ງກ່າວ ​ໄດ້​​ໄປ​ປະຕິບັ​ດງານ​ ຢູ່ ຊີຣີ.

​ໃນ​ໄລຍະ​ສົງຄາມ​ອິນດູຈີນ ຄັ້ງ​ທີ 02, ອາ​ເມ​ລິ​ກາ ​ໄດ້​ຖີ້ມລູກລະ​ເບີດ ຢູ່ ລາວ ປະມານ 270 ລ້ານ​ລູກ, ປະມານ 1/3 ຂອງ​ລູກ​ລະ​ເບີດ​ຈຳນວນ​ດັ່ງກ່າ​ວ ​ແມ່ນ​ຍັງ​ບໍ່​ໄດ້​ຖືກ​ທຳ​ລາຍ.

ຣັດເຊຍ ໄດ້ໃຫ້ສັດຕະຍາບັນໃນສັນທິສັນຍາ ກັບ ສປປ ລາວ ວ່າດ້ວຍການໂອນຕົວນັກໂທດ

ທ່ານ Vladimir Putin, ປະທານາທິບໍດີ ​ແຫ່ງ ສ. ຣັດ​ເຊຍ ໄດ້ລົງນາມໃນກົດຫມາຍວ່າດ້ວຍ ການ​​ໃຫ້​ສັດຕະຍາບັນ ລະຫວ່າງ ຣັດ​ເຊຍ-​ລາວ ກ່ຽວກັບການ​ໂອນ​ຕົວ​ນັກ​ໂທດ​ຜູ້​ທີ່​ຖຶກຕັດ​ອິດສະຫຼະພາບ.

ສົນ​ທິສັນຍາ ສະບັບ​ດັ່ງ​ກ່າວ ​ໄດ້​ລົງ​ນາມ​ໃນ​ວັນ​ທີ 26 ກັນຍາ 2017 ທີ່ ນະຄອນຫຼວງ​ມົດ​ສະ​ກູ, ສ. ຣັດ​ເຊຍ ແລະ ມີຈຸດປະສົງໃນການສ້າງກອບກົດຫມາຍສາກົນ ໃນຂອບການຮ່ວມມືສອງຝ່າຍ ກ່ຽວກັບການ​ໂອນ​ຕົວ​ນັກ​ໂທດ ຜູ້​ທີ່​ຖືກ​ຕັດ​ອິດສະຫຼະ​ພາບ ທີ່​ຈະ​ຊ່ວຍປົກປ້ອງສິດ ​ແລະ ຜົນປະໂຫຍດຂອງພົນລະເມືອງ ຣັດ​ເຊຍ ​ແລະ ສປປ ລາວ ​ໄດ້​ຢ່າງ​ຖືກຕ້ອງ​ຕາມ​ກົດຫມາຍ.

ໃນວັນທີ 09 ກັນຍາ 2018 ຢູ່ ສະຖານທູດ ແຫ່ງ ສ.ຣັດເຊຍ ປະຈຳ ສປປ ລາວ ໄດ້ມີການເລືອກຕັ້ງສະມາຊິກສະພາ ດູມາ ຂອງ ສະຫະພັນ ຣັດເຊຍ

ລັດຖະບານ ແຫ່ງ ສ. ຣັດເຊຍ ໄດ້ສົ່ງເຄື່ອງຊ່ວຍເຫຼືອມະນຸດສະທໍາໄປຍັງ ສປປ ລາວ

ວັນທີ 25 ສິງຫາ 2018, ຄະນະ​ກຳມາ​ທິການ​ພິ​ເສດ​ຂອງ ກະຊວງປ້ອງກັນພົນລະເຮືອນ ​ແລະ ພາວະ​ສຸກ​ເສີນ ​ແຫ່ງ ສ. ຣັ​ດ​ເຊຍ ​ໄດ້​ນຳ​ເຄື່ອງ​ຊ່ວຍ​ເຫຼືອ​ມະນຸດສະທຳ ​ໄປ​ຊ່ວຍ​ເຫຼືອ​ປະຊາຊົນ​ລາວ ຜູ້​ທີ່​ໄດ້​ຮັບ​ຜົນ​ກະທົບ​ຈາກ​ໄພພິບັດ​ນໍ້າ​ຖ້ວມ ຢູ່​ທາງ​ພາກ​​ໃຕ້ ຂອງ ສປປ ລາວ ເປັນ​ຈຳນວນ​ຫລາຍ​ກ່ວາ 35 ​ໂຕ່​ນ, ​ໃນ​ນັ້ນ ປະກອບມີ: ​ເຄື່ອງ​ຈັກ​ປັ່ນໄຟຟ້າ, ອາຫານ, ​ເຕັ່ນ (tent), ຜ້າຫົ່ມ, ເຮືອ ​ແລະ ​ເຄື່ອງ​ໃຊ້​ຄົວ​ເຮືອນ. ສຳ​ລັບເຄື່ອງ​ຊ່ວຍ​ເຫຼືອ ທີ່​ນຳ​ໄປ​ຊ່ວຍ ປະຊາຊົນ​ລາວ ລວມ​ທັງ​ຄ່າ​ໃຊ້​ຈ່າຍ​ ໃນ​ການ​ຂົນ​ສົ່ງ​ເຄື່ອງ​ໄປ ສປປ ລາວ ມີ​ມູນ​ຄ່າຫລາຍ​ກວ່າ 500.000 ​ໂດ​ລາ.

​ພິທີ​ມອບ-​ຮັບ​ເຄື່ອງ​ຊ່ວຍ​ເຫຼືອ​ດັ່ງກ່າວ ​ແມ່ນ​ຈັດ​ຂື້ນ​ຢູ່ ສະຫນາມ​ບິນ​ສາກົນ​ວັດ​​ໄຕ, ນະຄອນ​ຫຼວງ​ວຽງຈັນ ​ໂດຍມີ​ຜູ້​ຕ່າງ​ຫນ້າ​ເຂົ້າ​ຮ່ວມ​ຈາກ ຝ່າຍຣັດ​ເຊຍ ແມ່ນ ທ່ານ ມີ​ຄາ​ອິນ ບາຣານົບ, ​​ເອກ​ອັກຄະ​ລັດຖະທູດ​ຜູ້​ມີ​ອຳນາດ​ເຕັ​ມ ​ແຫ່ງ ສ. ຣັດ​ເຊຍ ປະຈຳ ສ​ປປ ລາວ ​ແລະ ຝ່າຍ​ລາວ ​ແມ່ນ ທ່ານ ຄຳ​ແກ້ວ ສານ​ບຸນ​ຄູນ​ໄຊ, ຮອງ​ລັດຖະມົນຕີ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ, ພ້ອມດ້ວຍຄະນະທີ່ກ່ຽວຂ້ອງຂອງ ສປປ ລາວ ເຂົ້າຮ່ວມນຳ.

ຣັດ​ເຊຍ ​ເປັນ​ປະ​ເທດ​ຫນຶ່ງ​ທີ່​​ໃຫ້ຄວາມ​ສຳຄັນ​​ໃນ​ການ​ຊ່ວຍ​ເຫຼືອ ​ແກ່​ລັດຖະບານ ​ແຫ່ງ ສປປ ລາວ ​ເນື່ອງ​ຈາກ​ວ່າ ສປປ ລາວ ​ໄດ້ຮັບ​ຜົນ​ກະທົບ​ຈາກໄພພິບັດ​ນໍ້າ​ຖ້ວມ ອັນ​ເປັນ​ເຫດ​ເຮັດ​ໃຫ້ ​ເຂື່ອນ​ໄຟຟ້າ ​ເຊ​ປຽນ-​ເຊ​ນໍ້າ​ນ້ອຍ ​ແຕກ-ຫັກ ຢູ່​ແຂງ ອັດ​ຕະປື. ອີງ​ຕາມ​ການ​ລາຍ​ງານ​ຂ່າວ​ຈາກ ອຳນາດ​ການ​ປົກຄອງ​ທ້ອງ​ຖີ່​ນ ​ແມ່ນ 13 ​ຫມູ່​ບ້ານຖືກທໍາລາຍ, 5 ຫມູ່​ບ້ານ​ຖືກ​ນໍ້າ​ຖ້ວມ ​ແລະ ປະຊາຊົນ ຫລາຍ​ກ່ວາ 6000 ຄົນ ​ແມ່ນ​ສູນ​ເສຍ​ທີ່​ພັກ​ອາ​ໄ​ສ.